عايزة أشطب شقتى ومحتارة ..........مش عارفة اختار الوان ايه .............طيب اتفرجت على فرش الشقة ولقيت الوان حلوة كتيرة فى موديلات كتيرة بس ياترى ايه الى يليق مع بعضه ؟؟؟؟؟؟؟؟؟ طيب الارضيات ولا الحمامات اختار ايه وياترى هيليق مع بعضه ؟؟؟؟؟دايما محتارين بين الالوان الاختيارات كتيرة جدا وتفاصيل اكتر ؟؟؟ علشان كده هنبتدى حلقات لتعليم فن الديكور بطرق مبسطة ........لان معظمنا مش ليه علاقة بمجال فن الديكور اوالفن التشكيلى علشان كده مش هتكون الحلقات معقدة ........والنهاردة اول حلقاتنا ان شاءالله هتكون عن الالوان عامة وبعدين هنتعرض فى الحلقات الجايه للتفاصيل فى اختيار السيراميك وخلافه .......خلينى اقول ليكم على شوية أسرار الاول عن الالوان فى الديكور وديه قواعد عامة هنمشى عليها لو حبيبن بيتنا يطلع زى الكتالوجات أوكيه.
ست قواعد سحرية للالوان فى الديكور
- قاعدة سحرية أولى لو حببين الغرف الصغيرة والتواليت والمطابخ تظهر بمظهر اكبر فى المساحة ...........قاعدتنا بسيطة جدا وناجحة جدا بتقول علشان يتحقق ده لازم يكون لون الارضية ولون الحوائط ولون السقف لون واحد من الوان فاتحة .........ولو السجاد برده فاتح زي لون الارضية والحائط هيزيد من وسع المكان .........طيب لو الارضية غامقة زى الخشب .....ندهن الحوائط بنفس الدرجة بس الفاتح منها والفكرة العامة هنا اننا بنخلى خطوط الغرفة غير مقطوعة فى العين بمعنى تانى العين كده بتلف فى دايرة يعنى بنخدع العين ومعنا امثلة من الصور .
 |
| قاعدة بسيطة جدا وناجحة جدا ألوانك للحوائط والارضيات والسقف برده لون واحد هتحصلوا على نتيجة هايلة بأبسط الأثاث |
 |
| مفيش اجمل من هدوء اعصاب زى ده اسرار الديكور بسيطة بس نركز فى الالوان |
 |
| اللون الاوف وايت ارضيات حوائط سجاد قاعدة ذهبية لاضافة اتساع للمكان واناقة |
 |
لون درجة الوان ارضيات التواليت زى درجة لون الحائط فاتحة علشان كده رغم ان التواليت صغير بس مريح جدا فى العين وديكوره هايل
طيب لو عملنا القاعدة السابقة مع الوان غامقة ايه النتيجة ؟؟؟ الالوان الغامقة للارضيات مع حوائط غامقة هتكون النتيجية ان المكان يصغر فى العين ..........بس ملحوظة مهمة السقف مع الالوان الغامقة بيكون فاتح زى الأمثلة الى معانا من صور تالية .
|
 |
| اللون الغامق للارضيات مع الحوائط صغر المكان ........هو جميل لو عايزين نحس بجو من التقارب والتفاعل فى المكان |
 |
| اللون الغامق لازم نكسره بلون مشرق فاتح زى الكرسى والوسائد هنا علشان اللون الاغمق الزايدة عن الحد بيخلينا نحس بكأبة ونفور من المكان |
- قاعدة رقم اثنين .......مفيش علميا لون اسمه ابيض ناصع ولا أسود وبدون دخول فى التفاصيل لو حبينا نستخدم اللون الابيض فى دهانات الحوائط هيكون اوف وايت فاتح جدا بالذات للاسقف ..........ولو حبينا يدخل اللون الاسود معانا فى الدهان هيكون لون رمادى غامق جدا مش أسود .
- قاعدة رقم 3 الالوان بنقسمها الى قسمين الوان دافئة والوان باردة ........الالوان الدافئة بتخلى المكان فيه حرارة وحيوية وديه الوان الاحمر والاصفر ومشتقاتهم والالوان البادرة هى مجموعة الازرق والاخضر وديه بتخلى المكان اكثر هدوء ويميل الى الذبول ولازم تحددوا اى قسم انتوا بتحبوا ..........علشان ديه مجموعة الالوان الى يمشى كل ديكورك عليها سواء غامق فاتح بس طريق واحد......علشان نوحد جو الوان المكان وده سهل جدا افتحى دولابك وشوفى اكتر ملابس انتى بتراحتى فيها وبتحبى تلبيسه وهتعرفى انتى فى اى جهة بسهولة .
 |
| مجموعة الالوان الدافئة والالوان الباردة ونلاحظ ان الاخضر الزيتى هو لون دافىء على الرغم من أن اللون الاخضر بارد |
- قاعدة رقم 4 درجة اللون الواحد فيها ثلاث أنواع درجة مط و درجة نصف مط ودرجة لامعة فى الدهانات والسيراميك للحوائط والارضيات ..........القاعدة بسيطة اللون المط بيبان افتح درجتين من اللون اللامع واللون النصف مط افتح درجة من اللامع ..................و اللون اللامع لازم نعرف أنه بيتفاعل مع الجو المحيط مع الاضاءة بيعكسها وكل ما تزيد درجة لامعانه بيكون زى المراية بالضبط ............اما اللون المط بيمص الاضاءة ويجعلها اكثر هدوءا ........يعنى لو المكان فيه اضاءات كتيرة نجف اسبوتات بنبعد عن دهانات الحوائط اللامعة وعن سيراميك الحوائط اللامع ونكتفى باللون المط أو نصف مط .....اما الارضيات فقاعدة عامة المط اجمل بكتير فى السيراميك والباركيه ماعدا البورسلين والرخام هما الوحيدين الاختيار اللامع .
 |
الصورة ديه نفس درجة اللون ....لكن الدرجة لمعان كامل فى الشمال ثم الوسط نصف لامع واليمين مط ......نلاحظ اختلاف الدرجة فى العين رغم انها نفس الدرجة
نلاحظ هنا استخدام نفس درجة اللون المط كارضية واللامع كالاستنسيل وده من اسرار الديكور للدهانات |
- قاعدة عريضة رقم 5 كل القواعد الى فاتت مش هتبدئى تنفيذها الا لما تختارى الاثاث الأول ........يعنى غلطة كبيرة جدا لو بدأنا نشطب البيت قبل اختيار الأثاث .........لان ممكن نختار ألوان للتشطيب وبعدين نختار ألوان تانية للاثاث مش لايقة مع التشطيب فتكون النتيجة فستيفال فظيع وغير مرضية بالمرة.
- قاعدة أخيرة مهمة رقم6 الاضاءة الاضاءة الاضاءة ..........كتيير منا بيفرط فى الاضاءة للدرجة غير مريحة لان الاضاءة بتفاعل مع الالوان وبتغيرها فى ساعات كتييرة ..........كل ما الاضاءة تكون اهدىء وموزعة على المكان صح هنلاقى شكل الالوان تحفة .............وحاجة مهمة جدا للمحبين اضاءة النيون .........ديه اضاءة صناعية بتخلى اللالوان للديكور كان اللون عليه جير وذبلان جدا ........اجمل اضاءة الى شبهه اضاءة الشمس الاوف الوايت الاصفر الفاتح لون اشعة الشمس .....ديه بتخلى المكان روعة .........وكمان ملحوظة مهمة جدا موزعين الدهانات أذكياء للغاية معظم محلات اضاءات نيون ابيض فلما تختاورا درجة اللوت تأكدوا تماما انكم بتختاروا الدرجة فى الخارج فى ضوء الشمس .
 |
| الصورة الى اليمين لون الحائط بيان انه رمادى بدل البنى الكافيه نتيجة الاضاءة البيضاء...اما الصورة الى اليسار بتبين اللون الكافيه بنفس درجته بسبب الاضاءة الاصفر الفاتح |
